BALLATA DI L'AMURI

di Vito Fiorentino

Fu accussi ca 'nni canusciemmu:

comu ogni matina

m'attruvavu 'a banca,

pu' me' travagghiu;

'nfacci a mia,

a'dda banna 'ru bancuni,

all'improvvisu vitti,

com'una visione,

un raggiu ri luci,

'na faccia ri picciotta bedda,

accussì bedda,

c'appi a diciri

“unn'haiu vistu mai 'na faccia

accussi!”

Ci piensu ancora

... e 'mi sientu trimari 'u cuori.

'A so taliata parrava

e mi ricia cosi c'un'avia sintuto mai

cuminciammu a viririnni

e i so' pensieri

mi piacianu;

ci attruvava chiddu chi siempri

ni me' prieri

avia addumannatu o' Signuri

“bedda o semplici che sia

fatimi attruvari,Patri,'na cumpagna

pi' caminari versu ri tia”

mi sentu trimari ancora u' cuori

quannu piensu

e' nostri nisciuti:

faciamu 'na passiata

e i pieri parianu ballari suli suli;

i nostri riscursi

'un finianu mai:

si facia scuru e

nn'a so timidezza e 'nna so' firmizza

scupria 'u so munnu

liggia i so' pinsieri

truvava i so' difficultà

ch'addiventaru me' difficultà.

Quannu ammùccia sotto u tappito

i so' delusioni,

n'attruova paruoli

pi' diciri i so' ideali,

- chiddu chi viri giustu o sbagliatu

pi' mia, pi' nuatri, p'a nostra vita -,

'a 'ncocciu ca' mia tinirizza;

cu l'amuri la taliu così com'è

e ringraziu u Signuri

r'avillima fatta canusciri.

Ch'u s'aspettava

chi m'avia 'nnamurari r'una fimmina

accusì diviersa ri mia!?

Eppuri 'sta so diversità mi piaci

mi fa sientiri sicuro di mia

e r'i me' cirtizzi

in mia attruovu 'a me' stidda

'i me' sapiri

'a mia volontà

(4/settembre/1973-2012)