Odi a lu Primu Jornu di l'Annu

di Pablo Neruda (riduzione e traduzione in lingua siciliana di Fonso Genchi)

Lu distinguemu di l'àutri
comu si fussi un cavadduzzu
diversu di tutti li cavaddi.
Ci addubbamu la frunti
cu un lazzu,
ci mittemu 'n capu a lu coddu ciancianeddi culurati,
e a menzannotti
lu ricivemu
comu si fussi
un esploraturi chi scinni di na stidda.
Comu lu pani assimigghia
a lu pani d'ajeri,
comu 'n aneddu a tutti l'aneddi...
La terra accogghi stu jornu
d'oru, grigiu, azzolu,
lu sparma nta li collini
lu vagna cu filecci
di trasparenti acqua di celu
e poi l'ammogghia
nta l'umbra.
Eppuru
porta nica di la spiranza,
novu jornu di l’annu,
si puru tu si uguali a l'àutri
comu li pani
a ogni àutru pani,
ni preparamu pi vivìriti di na manera diversa,
ni preparamu a manciari, a ciuriri,
a sperari.